Пад Расонамі затрымалі 350 удзельнікаў турзлёту

Рух «Сям'я вясёлкі» аб'ядноўвае прыхільнікаў ідэі гарманічнага суіснавання з прыродай і пратэсту супраць умоўнасцяў капіталістычнага грамадства. Злёты праводзяцца у маланаселеных месцах, палатачныя гарадкі ставяць паблізу вадаёмаў.

На тых, хто хацеў адпачыць на прыродзе і сустрэцца са старымі сябрамі, 29 ліпеня здзейснілі міліцэйскі налёт. Людзей затрымлівалі цэлымі сем'ямі. Разам з дарослымі ноч у ІЧУ былі вымушаныя правесці і некалькі дзяцей, пішуць праваабаронцы.

На затрыманых склалі пратаколы за ўдзел у несанкцыянаваным масавым мерапрыемстве і папярэдзілі, што на працягу двух месяцаў іх чакае суд. Інфармацыя пра інцыдэнт удакладняецца.

Падобная гісторыя адбылася ў Віцебску ў 2025 годзе, калі замежныя студэнты са Шры-Ланкі сабраліся разам, каб адзначыць нацыянальны Новы год. Каля 300 юнакоў і дзяўчат зладзілі традыцыйную супольную імпрэзу, нават не падумаўшы, што трэба папярэдне атрымаць дазвол ад мясцовых уладаў.

Міліцыянты палічылі святкаванне парушэннем закона і кваліфікавалі яго як несанкцыянаванае масавае мерапрыемства. У выніку міліцыя затрымала больш за 300 замежнікаў. Гісторыя набыла розгалас у медыя напачатку 2026 года, калі ўнутраныя міліцэйскія дакументы трапілі ў публічны доступ.